Alsat-M

Përurohet pika kufitare Xhepishtë-Trebishtë

Fri, 17 May 2013 16:00:00 +0200

Ministrat e brendshëm të Shqipërisë dhe Maqedonisë, Flamur Noka dhe Gordana Jankullovska inauguruan sot pikën e kalimit kufitar në Xhepishtë-Trebishtë. Ministrja Jankullovska tha se hapja e kësaj pike erdhi pas kërkesës të qytetarëve të dy vendeve, ndërsa homologu nga Tirana vlerësoi se kjo pikë kufitare do të përmbushë të gjithë parametrat infrastrukturore.

"Sot morëm pjesë në hapjen solemne të pikës kufitare Xhepishtë-Trebishtë, sepse kjo ishte kërkesë e qytetarëve të këtij rajoni nga të dyja anët e kufirit. Kjo kërkesë qëndronte prej disa kohësh. Ne gjetëm forcën e përbashkët, me kuptim të ndërsjellë mes Shqipërisë dhe Maqedonisë, duke i përmbushëm kërkesat teknike për të funksionuar kjo pikë kufitare. Hapja e kësaj pike kufitare do t'ua lehtësojë jetën qytetarëve të këtij rajoni”.

"Ne jemi të vendosur që do ta çojmë deri në fund. Ju patë segmentin e rrugës, por të jeni të sigurt që punimet vazhdojnë. Është një rrugë e cila është në proces e sipër për të filluar asfaltimin me gjitha parametrat evropiane, dhe shumë shpejt do kemi kënaqësinë ta inaugurojmë përfundimin e punimeve të saj", tha Flamur Noka, ministër i brendshëm i Shqipërisë.

Dy ministrat e brendshëm u takuan edhe në pikën kufitare të Qafë Thanës ku inauguruan edhe qendrën kontaktuese mes dy ministrive, me qëllim menaxhimin e integruar të kufirit me dy vendeve. Gjithashtu, gjatë takimit, dy ministrat e brendshëm nënshkruan edhe një memorandum për bashkëpunim mes dy ministrive. Durim Etemi

Vazhdim i seancës së 60-të të Kuvendit

Thu, 16 May 2013 09:45:00 +0200

Kuvendi i Republikës së Maqedonisë sot do ta mbajë vazhdimin e dytë të seancës së 60-të, ndërsa paraprakisht seancë do të mbajnë edhe Komisioni për transport, lidhje dhe ekologji dhe Komisioni juridiko-ligjdhënës. Komisioni për punë dhe politikë sociale do të mbajë debat publik rreth Propozim ligjit për mbrojtje nga shqetësimi në vendin e punës.

Në rend dite të seancës së 60-të të Kuvendit janë propozimet e ligjeve për ndyshim dhe plotësim të Ligjit për veprimtari radiodifuzive dhe të Ligjit për veprim me objekte të ndërtuara në mënyrë të parregullt, që të dyja me procedurë të shkurtuar, për të cilat gjithashtu paraprakisht duhet të prononcohen anëtarët e Komisionit për transport, lidhje dhe ekologji dhe Komisioni juridiko-ligjdhënës.

BDI në ofensivë diplomatike

Mon, 06 May 2013 15:53:00 +0200

Delegacioni i BDI-së i kryesuar nga kreu i partisë Ali Ahmeti në ofensivë diplomatike. Ahmeti me delegacionin e tij po qëndron në SHBA. Në një takim me diasporën shqiptare në Çikago, lideri i BDI-së Ahmeti ka theksuar se shqiptarët janë të interesuar që Maqedonia sa më shpejtë të gjejë mënyra për zgjidhjen e çështjes së emrit. Ahmeti do të ketë prezantim në Institutin për Studime të Larta Ndërkombëtare “John Hopkins” me temë “Maqedonia, stabile ose jo”. Lideri i BDI-së gjatë qëndrimit në SHBA do të zhvillojë gjithsej 17 takime në institucione të ndryshme në SHBA.

“Kam një agjendë mjaft të ngjeshur. Në Uashington, Në takim jam me Stejt Departamentin, në Pentagon, në Shtëpinë e Bardhë, me Këshillin e lartë të sigurisë gjithashtu. Kam takim edhe me ndërmjetësuesin për kontestin e emrit z. Nimic, si dhe me përfaqësues të shoqatës shqiptaro-amerikane”, deklaroi Ali Ahmeti, kryetar i BDI-së.

Ndërkaq shefi i kabinetit të Ahmetit, Artan Grubi disa medieve vendore u ka thënë se qëndrimi i BDI-së dhe VMRO DPMNE-së për çështjen e emrit është i njëjtë, ashtu si i të gjithë subjekteve të tjera politike në Maqedoni, të cilat angazhohen për integrimin e vendit në strukturat euroatlantike. Ndryshe gjatë qëndrimit në sofrën Kërcovare në Çikago, Ahmeti ka falënderuar diasporën Kërçovare për përkrahjen e madhe që i dhanë kandidatit të BDI-së në ditën e zgjedhjeve. Ai gjithashtu para mërgatës shqiptare ka shpjeguar gjendjen politike në Maqedoni, përparimin e statusit të shqiptarëve dhe të arriturat pas konfliktit të vitit 2001. Benjamin Arifi

Tetovë: Bumçi takoi Ahmetin e Thaçin

Tue, 30 Apr 2013 18:31:00 +0200

Shefi i diplomacisë shqiptare Aldo Bumçi takoi sot në Tetovë edhe dy liderët e partive politike shqiptare Ali Ahmetin e BDI-së dhe Menduh Thaçin e PDSH-së. Bumçi me liderët e shqiptarëve të Maqedonisë bisedoi për marrëdhëniet mes Maqedonisë dhe Shqipërisë dhe mundësisë së thellimit të bashkëpunimit në fushën e ekonomisë dhe infrastrukturës.

“Folëm mbi zhvillimet politike në Maqedoni dhe në rajon informova ministrin për ecurinë e procesit zgjedhorë në Maqedoni,po ashtu biseduam edhe për intensifikimin e më tejmë të marrëdhënieve mes dy vendeve tona. Shqipëria është një vend mik i Maqedonisë me çka përherë në mënyrën më miqësore ka bërë çdo qasje për zhvillime të rëndësishme në Maqedoni. Këto qëndrime siç ma konfirmoi ministri edhe më tej do vazhdojnë”, deklaroi Ali Ahmeti, kryetar i BDI-së.

“Ne kemi mbështetur përherë integritetin sovranitetin dhe stabilitetin e Republikës së Maqedonisë, në vite të vështira për Maqedoninë Shqipëria i ka hapur kufijtë dhe i vuri në shërbim të saj portet për sipërmarrësit maqedonas,dhe ky është një qëndrim i joni i përhershëm.
E dëgjova me shumë vëmendje zotin Ahmeti dhe e përgëzova për mbarëvajtjen e zgjedhjeve lokale që janë një hap i rëndësishëm drejt integrimeve euro atlantike të Maqedonisë.
Diskutuam edhe për hapësirat e mëdha që ka intensifikimi i marrëdhënieve dy paleshe në fushën e tregtisë ekonomisë”, tha Aldo Bumçi, shef i diplomacisë së Shqipërisë. Alsat-M

Cërvenkovski njofton largimin nga kreu i LSDM-së

Fri, 26 Apr 2013 15:22:00 +0200

Askush nga LSDM-ja nuk komenton paralajmërimin e liderit Branko Cërvenkovski se nuk do të kandidohet edhe për një mandat të ri. Cërvenovskit më 24 maj i skadon mandati dhe në kongresin partisë që është caktuar për më 2 qershor do të zgjidhet kryesi e re. Largimin e tij nga kreu i LSDM-së, Cërvenkovski ia kumtoi mbrëmë vonë Këshillit të përgjithshëm të partisë pas disfatës së thellë të LSDM-së në zgjedhjet lokale. Ai siç bëhet e ditur ka thënë në mbledhjen partiake se largohet nga partia pasi nuk ka arritur të imponojë qëndrimin e tij për bojkotimin e zgjedhjeve lokale. Vendimin sipas tij anëtarët e kanë miratuar vetëm me ngritjen e gishtave por jo edhe me zemër. Nga kjo parti gjithashtu njoftojë se gjatë mbledhjes së mbrëmshme të Këshillit qendrorë ka pasur zëra të cilët kanë kundërshtuar vendimin e Cërvenkovskit për tu larguar, por Cërvenkovski kanë qenë i prerë se nuk kandidohet edhe për një mandat të ri. Ndërkohë pas miratimit e datës për mbajtjen e Kongresit kanë filluar të rrjedhin edhe afatet për kandidatët e rinj të cilët pretendojnë fronin e Cërvenkovskit. Tani për tani në opinion lakohen emrat e Zoran Zaevit, Igor Ivanovskit dhe Zoran Jovanovskit. Ky i fundit gëzon mbështetjen e dy nënkryetarëve të partisë Gordan Georgiev dhe Ana Pavllova-Daneva. Derisa Jo zyrtarisht mësohet se Radmilla Sheqerinska nuk do të kandidohet por mbështetjen e saj do t’ia ofroj Zoran Zaevit. Ky i fundit në një deklaratë për ‘24 Vesti’ ka konfirmuar se do të jetë njëri nga kandidatët i cili do të garoj për kryetarë të LSDM-së dhe nëse merr mbështetjen e delegatëve në Kongres atëherë ai për prioritet do të ketë konsolidimin e partisë. Në të kundërtën, nëse kandidatët në Kongres vendosin për ndonjërin nga kundër-kandidatët e tij, atëherë ai do të jetë mbështetës i fortë i tyre. Kandidaturat për kryetar të ri të LSDM-së do të verifikohen më 16 maj, për kur është caktuar edhe mbledhja e radhës e Këshillit Ekzekutiv të partisë. Ndërkohë, Andrej Zhernovski në cilësinë e kryetarit të PLD-së ka ofruar mbështetje dhe bashkëpunim të plotë për kryetrarin e ardhshëm të LSDM-së, pavarësisht se kush do të jetë ai.

“Asnjëherë nuk kam komentuar zhvillimet brenda-partiake, dje kisha mbledhje njëorëshe me zotin Cërvenkovski, kuptohet se biseduam edhe për hapin e tij dhe për atë se çfarë do të ndodhë më tej në LSDM, dhe kuptohet si parti më e madhe dhe dominonte në këtë politikë do të reflektohet gjendja edhe në mbarë koalicionin. Megjithatë ajo që mund ta them në emër të PLD-së, kushdo që të zgjidhet si kryetarë, ne do të vazhdojmë bashkëpunimin dhe do ta ketë mbështetjen nga ne si parti”, tha Andrej Zhernovski, kryetar i PLD-së.

Ndryshe, Cërvenkovski në krye të LSDM-së qëndron që nga viti 1991, me përjashtim të periudhës kur ishte presidenti i vendit gjatë të cilës u zëvendësua nga Vllado Buçkovski, Zoran Zaev dhe Radmilla Sheqerinska. Bedri Rexhallari

Tiranë, skadon afati i regjistrimit të koalicioneve zgjedhore

Wed, 24 Apr 2013 10:32:00 +0200

Ora 18:00 e ditës së sotme shënon dhe skadimin e afatit ligjor për regjistrimin e koalicioneve zgjedhore, në kuadër të zgjedhjeve parlamentare të 23 qershorit.

Neni 65, pika 1 e kodit zgjedhor të Shqipërisë parashikon që dy ose më shumë parti politike të regjistruara si subjekte zgjedhore në KQZ, mund të regjistrohen si koalicion zgjedhor në shkallë vendi jo më vonë se 60 ditë përpara datës së zgjedhjeve.

Dy kampet e mëdha politike PD dhe PS thuajse kanë përfunduar marrëveshjet me partitë e vogla dhe pritet që gjatë ditës së sotme të dorëzojnë në Komisionin Qendror të Zgjedhjeve(KQZ) listat e plota të koalicioneve.

Partia Demokratike dhe aleatët e saj zyrtarizuan dje koalicionin parazgjedhor nën emrin "Aleanca për Punësim, Mirëqenie dhe Integrim". Kjo aleancë e drejtuar nga Partia Demokratike numëron 25 parti të djathta dhe të qendrës, duke premtuar vazhdimin e reformave dhe përmirësimin e jetës së vendit.

Partia Socialiste e ndërtoi koalicionin e saj "Aleanca për Shqipërinë Europiane" duke nënshkruar marrëveshje me mbi 35 parti politike, ku më e rëndësishmja është ajo me LSI-në, që shënon dhe një kapitull të ri bashkëpunimi mes dy forcave të majta.
Dy partitë e reja në skenën politike shqiptare Fryma e Re Demokratike dhe Aleanca Kuq e Zi vendosën të konkurrojnë të vetme në zgjedhje, duke i ofruar kështu elektoratit shqiptar një alternativë të tretë.

Sistemi proporcional rajonal që aplikohet në Shqipëri favorizon aleancat e gjera dhe kjo u provua me zgjedhjet e 2009-s.

Në zgjedhjet e fundit parlamentare (2009) konkurruan katër koalicione zgjedhore. "Aleanca e Ndryshimit" ishte formacioni më i madh i përbërë nga 10 parti të djathta; koalicioni i majtë "Bashkimi për ndryshim", përbëhej nga 5 parti; ndërsa Aleanca "Poli i Lirisë" dhe "Aleanca Socialiste për Integrim", grupuan secila nga 6 parti.

SHGM kritikon propozim-ligjin për media

Mon, 22 Apr 2013 16:22:00 +0200

Me propozim-ligjin për mediat, Qeveria përzihet drejtpërdrejt në rregullimin e marrëdhënieve në redaksi. Kështu u tha sot në debatin kushtuar draftit në fjalë. Sipas kryetarit të SHGM-së Naser Selmani, një pjesë e zgjidhjeve të këtij pr/ligji janë skandaloze dhe bien ndesh me rekomandimet e Komisionit Evropian. Ndërkaq, në raportin e fundit të Departamentit Amerikan të Shtetit thuhet se Qeveria i detyron mediat dhe gazetarët të bëjnë auto-censurë, veçanërisht kur informojnë për tema qeveritare.

“Me përgjegjësi më të madhe, pohoj se në këtë pr/ligj, pak ose aspak fare, nuk ka zgjidhje për kritikat serioze dhe të vazhdueshme të Komisionit Evropian për gjendjen e lirisë së shprehjes dhe lirinë e mediave”, u shpreh Naser Selmani, kryetar i SHGM-së.

Propozim-ligji, sipas shumicës së pjesëmarrësve në debatin e sotëm, e vendos gazetarinë në kthetrat e politikës dhe biznesit, dhe godet veçanërisht, gazetarinë investiguese.

“Vërejtje më serioze e BE-së është ajo që mediat në Maqedoni punojnë nën presion politik dhe se pronësia e medias ka lidhje të fuqishme politike. Cila është përgjigjja e Qeverisë përmes këtij ligji? Përgjigjja është asgjë. E përshkruan nenin e vjetër të ligjit për veprimtari radiodifuzive në të cilin partia politike nuk mund të ketë media, por një lider i partisë politike mundet. Nëse është ashtu, atëherë le t’u jepet edhe partive, e drejta që të kenë media dhe së paku do të kemi situatë të pastër. Do të dimë se të kujt janë ato media“, tha Naser Selmani, kryetar i SHGM-së.

Një tjetër problem shtesë, sipas këtij projektiligji, do të përbëjë formimi i agjencisë së re, e cila duhet të rezultojë nga Këshilli i tanishëm për radiodifuzion, dhe që do të kontrollojë jo vetëm punën e mediave elektronike, por edhe të atyre të shtypura dhe të internetit. Kjo Agjenci, në të ardhmen do të jetë Ministri e fuqishme, ose një mostër me fuqi të pakufizuar, sipas një pjesë të gazetarëve. Në këto momente, miratimi i ligjit të ri është anuluar për dy muaj. Gjatë kësaj kohe, gazetarët duhet të paraqesin vërejtjet dhe rekomandimet e tyre, rreth ndryshimit të tij. Natasha Stojanovska

“Kulmi i Dashurisë”

Sun, 21 Apr 2013 22:08:00 +0200

Në jetë moderne të Manhatan, Rafi Gardet, një bukuroshe 37-vjeçare, fotografe po e rimerr veten nga divorci i saj.

Gjatë kësaj periudhe ajo njihet me Davidin, një piktor i pashëm 23-vjeçar, i cili është në vitin e fundit të kolegjit. Terapistja e Rafit, Dr. Lisa Metzger, e cili e ndihmon Rafi të kapërcej frikën e saj të intimitetit, konstaton se i dashuri i ri i Rafit - për fat të keq– është djali i saj i vetëm, David.

David dhe Rafi duhet të luftoj me dallimin e tyre në moshë si dhe me prejardhje të ndryshme. Pavarësisht tërheqjes së tyre intensive, çifti shpejt kupton se dallimi i madh në moshë dhe prejardhja familjare krijon shumë konflikt..

Uma Thurman, Meryl Streep, Bryan Greenberg sjellin në ekranin e TV Alsat-M, komedinë romantike

“Kulmi i Dashurisë”, të shtunën ora 21:30