Grupi Ndërkombëtar do të diskutojë për Kosovën

Grupi Drejtues Ndërkombëtar për Kosovën do të mblidhet të hënën në Vjenë për të diskutuar në lidhje me zhvillimet e muajve të fundit në Kosovë dhe për të vlerësuar progresin e institucioneve kosovare në fushat e ndryshme të përcaktuara me planin Ahtisaari. Në takimin e së hënës përfaqësuesit e 25 shteteve anëtare të këtij mekanizmi do të bëjnë dhe rishikimin e mandatit të shefit të Zyrës Civile Ndërkombëtare, Pieter Feith. Zëdhënësi i kësaj zyre, Andy McGuffi tha se gjatë këtij takimi do të bisedohet  kryesisht për arritjet në Kosovë, dhe krijimin e një pasqyre reale për dinamizmin e proceseve nëpër të cilat po kalon vendi ynë.
“Nuk do të ketë ndonjë temë specifike për të cilën do të diskutohet. Përfaqësuesit e këtyre shteteve do të diskutojnë lidhur me për progresin i cili është arritur si në fushën e decentralizimit, reformat në sektorin e sigurimit dhe për çështje tjera... Ne zyrtarisht po punojmë edhe në procesin e decentralizimit dhe krijimin e komunës veriore të Mitrovicës dhe jam i sigurt se edhe kjo do të jetë një pjesë e përfshirë në këtë agjendë”, tha zëdhënësi i Zyrës Civile Ndërkombëtare, Andy McGuffy.
Mandati i Përfaqësuesit Civil Ndërkombëtar, sipas propozimit për statusin, do të skadojë atëherë kur Grupi Drejtues Ndërkombëtar të konstatojë se Kosova i ka përmbushur kushtet e propozimit për statusin. McGuffy bëri të ditur se ndryshimet eventuale në mandatin e diplomatit holandez do të ndërlidhen me zhvillimet e bëra në Kosovë.
“Roli i Zyrës Civile Ndërkombëtare ka qenë gjithmonë i qartë. Ne jemi një organizatë dinamike, puna jonë ka të bëjë me situatat e ndryshme që ndodhin në Kosovë, dhe ne do t’ju adoptohemi këtyre situatave. Pra ISG do të shikoj për progresin i cili është bërë në fusha të ndryshme dhe do të arrijë në një përfundim duke u bazuar në gjithë këtë në mënyrë që do të vendosin për mandatin tonë”, tha Andy McGuffy, zëdhënës i Zyrës Civile Ndërkombëtare.
Përveç paraqitjes së raportit periodik të Përfaqësuesit Civil Ndërkombëtar, Feith para anëtarëve të ISG-së në këtë takim do të flasë dhe kryeministri i Kosovës, Hashim Thaçi, i cili do të prezantoj arritjet i institucioneve të Kosovës brenda kësaj periudhe.

Shkëlzen Osmani