Thaçi kërkoi mbështetje ndërkombëtare nga GDN

Kryeministri i Kosovës, Hashim Thaçi, ka kërkuar mbështetjen ndërkombëtare për realizimin e strategjisë për veriun.
Ai këto kërkesa i shpalosi, gjatë fjalimit të tij në takimin me përfaqësuesit e Grupit Drejtues Ndërkombëtar, ku ka prezantuar arritjet e Kosovës gjatë periudhës pas pavarësisë së vendit. Thaçi, bëri të ditur se Qeveria e Kosovës së bashku me EULEX-in dhe faktorët tjerë ndërkombëtar në Kosovë, është e vendosur që të bëjë të mundshëm sundimin e ligjit dhe përmirësimin e kushteve të jetës për qytetarët e pjesës së veriut.
“E kërkoj mbështetjen tuaj të plotë për këtë plan, mbështetjen e EULEX-it dhe bashkësisë ndërkombëtare, për integritetin territorial të Shtetit të Kosovës dhe përmirësimin e kushteve të jetës së qytetarëve në veri. Modeli i komunave të reja dhe i Shtërpcës do të funksionoj në Veri dhe për Leposaviqin, Zveçanin, dhe Zubin Potokun; do të këtë institucione legjitime dhe demokratike, shërbyes civilë, dhe zhvillim, qeverisje të mirë dhe luftë kundër dukurive negative”, tha Thaçi.
Sipas kreut të ekzekutivit kosovar, realizimi i planit për veriun e vendit, duhet të bëhet për arsye se qytetarët serbë në këtë pjesë duhet të jenë në gjendje që vetë të zgjedhin udhëheqësit e tyre pa frikë dhe presione nga Beogradi.
Kryeministri Thaçi, gjatë fjalimit të tij, ka folur edhe për njohjet e shtetit të Kosovës, ku sipas tij ky proces është duke shkuar me një ritëm të ngadaltë, si pasojë e vonesës së një vlerësimi nga Gjykata Ndërkombëtare e Drejtësisë. /alsat-kosova/