Veliu me akuza të ashpra: Gruevski si Millosheviqi /video/

Kryetari i Shoqatës së Veteranëve të Luftës njëherësh deputet i BDI Fazli Veliu, i ka dërguar një letër të ashpër kryeministrit Nikolla Gruevski. Veprimet e fundit të tij ai i ka cilësuar si antishqiptare dhe anti-qytetare dhe të njëjtat i ka krahasuar me veprimet e Millosheviqit duke përkujtuar se nëse vazhdohet me këtë mënyrë, do të pësojë fatin e njëjtë me të. Sipas Shoqatës, vendimi i fundit për mësimin e maqedonishtes nga klasa e parë, është kundër Kushtetutës së vitit 2002 dhe kundër ligjeve. “Mund të veproni si të doni, me forcën e shkopit dhe kamxhikut, por nuk mund të na detyroni të hymë në greminë, ku Ju jeni buzë saj. Asnjë perandori nuk ka mundur të na asimiloj, zhdukë,  as kjo që udhëhiqni ju. Nëse ju vazhdoni, njësoj sikur Millosheviqi, ju pret i njëjti fat, atje ku ai vetë shkoi dhe vetë përfundoi”, thuhet ne letrën e ShVL-së, të nënshkruar nga Veliu. “Nxënësit shqiptarë, së pari do të mësojnë gjuhën shqipe, e cila është gjuhë kombëtare, që ka hyrë në gjirin e gjuhëve të pranuara ndërkombëtare, mandej në moshë të rritur gjuhët e huaja, pra edhe gjuhën tënde, të cilën as ti nuk e di siç duhet”, shkruan në letrën e hapur. Edhe pse letra i është drejtuar numrit ‘një’ të Qeverisë, Gruevski tha se nuk ka dijeni për të.
“Çfarë letre? Prej kujt?...Nuk kam parë një letër të tillë”, theksoi Nikolla Gruevski kryeministër.
Por kryetari i SHVL-së pohon të kundërtën e asaj që thotë Gruevski. Ai tha se letra është nisur edhe në adresë të kryeministrit.
‘Jemi duke parë se kryeministri është duke bërë një lojë të rrezikshme, është duke vepruar kokë më vete dhe është duke vepruar në kundërshtim me normat që u takojnë kombeve këtu, me normat që u takojnë qytetarëve dhe në kundërshtim me normat ndërkombëtare të veprimit në një shtet mulktietnik siç jemi ne”, deklaroi Fazli Veliu kryetar i SHVL.
Një nga arsyet për dërgimin e letrës, Veliu thekson edhe pa aftësinë e përfaqësuesve shqiptar në Qeverinë ‘Gruevski’ që të ndikojnë në tërheqjen e vendimit të ministrit të Arsimit. Veliu njëherësh ka vënë në pah edhe vështirësitë në të cilat hasin ministrat shqiptarë përfshirë këtu edhe zëvendëskryeministrin Ademi.
“Vështirësia e parë është se subjekti ynë politik në qeveri nuk ka në dorë asgjë, por ka vetëm urdhra, nuk e di se ku dhe si shkojnë mjetet, projektet të cilat vijnë në dorë të përfaqësuesve tanë në qeveri vijnë me vonesë dhe njëkohësisht edhe shtyhen afatet e realizimit të tyre dhe më në fund atje zëvendëskryeministri diskriminohet dhe njëkohësisht edhe kërcënohet që ta lëshoj vendin e punës si zëvendëskryeministër”, shtoi Veliu.
Fazli Veliu bashkë me Rafis Halitin dhe Xhevat Ademin, pas kongresit të partisë, mbeti jashtë Kryesisë Qendrore të BDI.

Gjyltene Rexhallari