LSDM-ja kërkon referendum për projektin “Shkupi 2014”

Projekti “Shkupi 2014” të shtrohet në referendum dhe për këtë të vendosin vetë qytetarët, kështu kërkoi LSDM-ja nga kryeministri Gruevski.
Sipas kësaj partie opozitare, ata që deri dje betoheshin në referendum sot janë fshehur në vrimë të miut dhe për projektin ‘Shkupi 2014’ sepse dëshirojnë ta dëgjojnë mendimin e qytetarëve. Nga partia e Cërvenkovskit gjithashtu paralajmëruan se po qe se kërkesa për referendum hasë në veshë të shurdhër të Gruevskit, atëherë përmes Grupit parlamentar të saj do të ngrenë iniciativë që kjo çështje të debatohet në Parlament.
“Kjo çmenduri e VMRO-DPMNE-së duhet të përfundoj. Edhe njëherë i bëjmë thirrje Gruevskit, njeriut i cili vazhdimisht thotë se më me rëndësi është mendimi i popullit, që të shpallë referendum për projektin Shkupi 2014. Ndërkohë duke shqyrtuar mundësitë tjera juridike për ndalimin e këtij projekti, LSDM-ja do të parashtrojë kërkesë përmes grupit parlamentar për thirrjen e një seance urgjente për shqyrtimin e kësaj çështjeje”, deklaroi Gordan Georgiev, nënkryetar i LSDM-së.
Nga ana tjetër Demokracia e Re gjithashtu kërkon që çështja Shkupi 2014 të shtrohet për diskutim në parlament dhe vendimi rreth këtij projekti të merret me shumicën e dyfishtë, gjegjësisht parimin e Badinterit.
“Momenti më i mirë dhe më i qëlluar për Demokracinë e Re do të jetë një debat i hapur pikërisht këtu në parlamentin e Maqedonisë dhe duke përdorur votimin e dyfishtë që të aprovohet një projekt i këtillë. Gjithçka tjetër, ashtu siç është prezantuar se është një projekt i qytetit ose një projekt i komunës Qendër besoj se na kthen pas viteve të 90 kur kishte majorizime ndaj shqiptarëve dhe popujve tjerë”, theksoi Imer Selmani, Kryetar i DR-së.
Edhe PRSD-ja e Petkovskit është në vij të njëjtë me LSDM-në dhe DR-në, nga kjo parti shfaqin brengën se projekti i Gruevskit, do të acaroj marrëdhëniet ndëretnike
“Këtë që po e bën Qeveria pa mos konsultuar qytetarët dhe partitë politike, mund ta nxjerr situatën jashtë kontrollit në fushën e marrëdhënieve ndëretnike. Në rast kur keni qëndrimet të prera se ose do të ndërtohet xhamia bashkë me kishën,ose nuk do të ndërtohet as njëra e as tjetra, atëherë do të thotë do të vije deri te konflikti, deri te eskalimi i situatës, e cila nuk do të mund të kontrollohen”, tha Tito Petkovski, kryetar i PRSD-së.
Ndaj akuzave të opozitës, kundërpërgjigjet VMRO-DPMNE-ja, duke iu shmangur çështjes së referendumit dhe duke përgënjeshtruar LSDM-në se projekti në fjalë, nuk kushton 200 milion euro por 80 milion euro.
“Është gënjeshtër dhe manipulim i LSDM-së se projekti kushton 200 milion euro. Kjo nuk është e saktë, projekti kushton më pak ose 0.5 për qind nga buxheti i implementuar në 8 vite buxhetore. Do të thotë 80 milion euro në ndara na 8 vite buxhetore, nga të cilat një pjesë e mirë tani më janë investuar. Nga 9 objektet e parapara, 7 kanë filluar të ndërtohen, kurse të tjerat janë hotele dhe objekte publike në të cilat do të investojnë investitorë privatë”, u shpreh Aleksandar Nikollovski, anëtar i KE-së të VMRO-DPMNE-së.
Projekti Shkupi 2014 ka zgjuar edhe reagimin e shumë organizatave joqeveritare si dhe analistëve, të cilët kanë theksuar se realizimi i këtij projekti mund të cenoj marrëdhëniet ndëretnike në vend.

Bedri Rexhallari